Koʻhna Xovos 2500 yillik tarixga ega. Koʻxna Xovos Sirdaryo viloyatining, balki butun Mirzachoʻlning eng qadimiy va yirik arxeologik yodgorligidir. Qadimgi Ustrushona oʻlkasi tarkibiga kirgan bu manzilgohning mahobatli qoldiqlari hozirda Xovos tumanining janubi-gʻarbiy chekkasida, Karvonsaroy mahallasi qarshisida joylashgan. Bugungi kunda yodgorlikning umumiy maydoni 12 gektardan iborat. Yodgorlikning ark va shaxriston qismi deyarli toʻliq saqlanib qolgan, rabot qismi erni oʻzlashtirish jarayonida butunlay buzilib ketgan. Ark yodgorlikning shimoli-gʻarbida joylashgan, uning maydoni 1 gektardan oshiqroq, balandligi 20 metrga yaqin.